Á vormánuðum voru kynntar ívilnanir fyrir bæði nemendur og greiðendur til að koma til móts við bæði sérstakar og erfiðar aðstæður fjölda viðskiptavina sjóðsins á tímum kórónuveirufaraldursins. Þær ívilnanir eru enn til staðar og ber þar helst að nefna:

• Ef námsmanni hefur ekki tekist að sinna námi sínu vegna röskunar á hefðbundnu skólastarfi vegna kórónuveirunnar getur nemandi skilað inn staðfestingu skóla á ástundun sinni og óskað í kjölfarið eftir því að fá greitt í samræmi við lánsáætlun sína fyrir önnina.
  
  
• Ef skipulag skóla breytist og námskeið færast á milli anna og/eða skólaára getur nemandi óskað eftir því að tekið verði tillit til þess við mat á námsárangri.
  
  
• Ef námsmaður veikist af veirunni og getur ekki sótt skóla eða þreytt próf getur hann óskað eftir að tillit verði tekið til þess við útborgun námsláns.
  
  
• Námsmaður gat sótt um aukaferðalán á vormisseri vegna sérstakra aðstæðna vegna kórónuveirunnar.
  
  
• Umsóknarfrestur á vorönn 2020 var framlengdur frá 15. apríl til 1. maí og umsóknarfrestur haustannar 2020 framlengdur frá 1. september til 1. desember.
  
  
• Þeir sem sækja um námslán eftir námshlé eða hafa ekki verið á námslánum á síðasta skólaári fá fimmfalt frítekjumark.
  
  
• Hægt er að óska eftir því að tekjur námsmanna vegna vinnu þeirra við bakvarðasveitir heilbrigðis- og velferðarþjónustunnar og bakvarðarsveit lögreglunnar verði dregnar frá við útreikning á framfærslu námsmanns skólaárið 2020-2021.
  
  
• Námsmenn sem fá greiddan út séreignasparnað á árinu 2020 geta óskað eftir því að hann verði undanþeginn við útreikning á námsláni skólaárið 2020-2021.
  
  
• Við mat á umsóknum greiðenda um undanþágu frá afborgun 2020-2021 vegna verulegra fjárhagsörðugleika er heimilt að horfa til tekjumissis á þann veg að nú verði heimilt að horfa til tekna greiðanda síðustu tveggja mánaða fyrir gjalddaga og annarra sérstakra aðstæðna sem skapast hafa hjá greiðendum vegna kórónaveirunnar.
  
  
• Eindaga námslána var frestað um 30 daga og þar með var öllum innheimtuaðgerðum einnig seinkað eins og t.d. sendingu í milli- og löginnheimtu.